الشاعر ،، احمد عثمان

آدم وحواء
آدم خلق من أديم  الأرض
يعني التراب او الطين فطباع
نسله من كل اشكال وطباع الأرض
فيه ناس زي الأرض الخصبة دايما مثمرة
متجددة و معطاءة على قد ما بتديها بتديك 
خير و ضل و بهجة الناس دي بتكون واضحة
كدة من صغرها بيشعوا طاقة إيجابيه لكل اللي حواليهم
بيملوا مكانهم و يفرضوا وجودهم تحسهم نجوم في ليالي
الظلمة تهديك الطريق فى التوهه و تحلي الأيام بتلمع كدة منين ما تروح لو لقيتهم او اتكعبلت فيهم نصيحه اوعي تسيبهم او تضيعهم دول تمسك فيهم بإيديك وتبت اللي زي دول ما بيتعوضوش .
و فيه ناس زى الارض البور مهما اديتها تاخد بس و مهما تعبت معاها بتفضل قاسية و جافه مهما سقيتها تشرب و ما تديش و يوم ما تجود عليك تطلع فرع ضعيف لا يضلل و لا يثمر و اقل نسمة هواء تكسره دول خسارة فيهم تبذل معاهم اي مجهود خسارة تهدر وقتك و حياتك معاهم تجنبهم على قد ما تقدر و
لو تقدر تهرب اهرب من اي علاقة قايمة على الإستغلال اي علاقة تاخد بس اي علاقة سكتها اتجاه واحدلأنها مش هتخلص الا لما تخلص عليك .
و فيه ناس زي الصحراء تظنها جافة و ميتة مع انها مليانة حياة مهما إرتوت بمطرة تخدعك بمظهرها القاسي ولو نقبت تكتشف ان كله متخزن و مارحش هدر أبيار عميقة حتى لو هي نفسها ما تعرفش او ماتبينش بتستنى اللحظة اللي تكشف فيها كنوزها اللحظة اللي بتخبطها رجلين اسماعيل بتفجر عيون زمزم فجأة تلاقيها واحة فجأة الحياة تدب و تظهر و تبان تلاقي جمال عمرك ما شوفته و دفا عمرك ما حسيته و هدوء و سكينة عمرك ما قابلتها كإنها بتقولك شكرا شكرا على صبرك و على ايمانك بيا شكرا على ظنك و احساسك شكرا انك بصيت ابعد من حبات الرمل اعمق من سطح جاف من فضا يخوف من طبيعه قاسيه بتقولك شكرا انك شوفت اللى ماحدش شافو فيا انك آمنت اني مش ميتة ان جوايا في مكان ما لسة حياة قادرة تنبض و تعافر شكرا انك ما كنتش في حياتها مجرد عابر سبيل شكرا انك كنت ليها رجلين اسماعيل فجرت طاقة حبها و فيضت انهار خيرها دبيت فيها الحياة تاني مش عشمتها ومشيت شكرا
و زي ما الطيور على اشكالها تقع  النبتة بتحن لأرضها و تربتها .. لو اتزرعت فى غير مكانها تجف و تموت  و لو اتوجدت فى مكانها الصح تزهر و تورد  دور على الأرض اللي شبهك  ماتعافرش ف البور  دور على اللي يضلل و اللي يديك قد ما ياخد اللي معاه تقدر تشق جذورك و تمد فروعك دور على الخير فى قلوب البشر بص لأبعد من مجرد سطح  افتح ببان و نفض تراب دور على ضلعك اللى اتاخد منك حتلاقيه
العلاقات محتاجة تعب ومجهود مثابرة و أهتمام ثقة و إيمان ان فيه حاجة حلوة حتى لو مستخبية و مش باينة مستنية بس اللي يستاهلها اللي تعب علشان يوصلها اللي يستاهل يتمتع بجنتها جنة آدم هى حواء افهموا بقاااا
وينك ياحواء..