زجل مغربي
بَاسُو فْ راسو ...
كلامو بَايَخ مَعطوب
همّو ف كاسو ..
معاه ما نشرك شروب
زاد تهواسو...
فاهم الدنيا مقلوب
حد ما قاسو ...
و تراه جاري ف هروب
حفر بفاسو ...
بين مرجة و شعوب
غرس غراسو ...
وغرسو دابل معيوب
بالسوس تقاسو...
و عشش فيه اليعسوب
طار نعاسو ...
و بقى تالف منكوب
تصدى نحاسو ...
وما بقى قدرو محسوب
جيابو تساسو....
وكل جيب عندو مثقوب
باع لباسو ...
ب ثمنهم شرى مشروب
تزاد وسواسو ...
و كثر لغا و شجوب
فات قياسو ...
و راح امرو مغلوب
طاحو ضراسو ...
و عاد فمو معطوب
تفرقو ناسو...
و ما عاد ليه وجوب
فقد وْناسو ...
و هجرت سيرتو لقلوب
عزا ف عراسو ..
كان سبابو لكدوب
سد بابو...
وبقى فجحرو مدسوس
طْلق كلابو ...
و يظن انو محروس
تنكر صحابو....
و بقى لحالو مهووس
صحابو غابوا....
تراه زهرو منحوس
شي ما يكسابو....
لا بيض و لا فلّوس
قرقب قرابو....
لقاه صمك مكبوس
تفگد قبابو .....
لا شريحة لا كرموس
جاه خرابو ....
و الحلم رجع كابوس
خطا ف حسابو ....
سبابو ما حفظ دروس
خاب و خابو ....
معاه شحال نفوس
زاد عذابو ....
ماكان فعلو مدروس
لفّاد رطابو ....
وصار ظهرو مقووس
زاد عصابو ....
و ما بقى طايق گلوس
غَزْ بْ نابو ....
بسنان عضة و ضروس
قطَّع ثيابو ....
و عاد حالو ميؤوس
جاو حبابو ....
هزوه كيف العتروس
حطوه و غابو ....
فمقام اللي ممسوس
طل غرابو ....
و راح ف حضان رموس
يزيد علوي اسماعيلي
ليست هناك تعليقات:
إرسال تعليق