الشاعر .. حسن محمد علي

الليل بالنهار
---
عمرك شفت الورد
حزين بيعيط
عمرك شفت واحد مهموم
فرحان ومزئطط
--
عمرك شفتني
بيهمني
مع اني طول عمري
ألف أه بتحبني
ومليون جرح بيضمني
ولا همني
وعايش فرحان وبزغرط
--
عمرك شفت الليل بالليل
خالي م السهر والمواويل
عمرك شفت الليل بالنهار
أه شفته
وعرفته
مليان مرار
مر وعلقم
صبار
طريق مالوش اخر وطويل
الحزن فيه انهار
وفرحه بينقط
--
عمرك شفتني
ماشي من غير برفاني
ماشي رجليا مش شيلاني
مع اني طير مدبوح
وكلي مليان جروح
بس قلبي
هوه اللي بيعيط
--
عمرك شفت البحر
ماشي من غير شطين
عمرك شفت اللقا والفراق
اصحاب هما الاتنين
طب عمرك شفتني
بيهمني
أو بخاف
مانا شفت اللي محدش شاف
بس انا خايف
اصل انا شايف
حاجات مبتتشفش
حاجات لامسها
حاجات حاسسها
طب هي ايه
ماقولش
خليني سايبها للظروف
يمكن اقدر اطرد
من جوايا الخوف
مع ان احساسي
مبيخيبش
وأديني مستنيه
علي بابي
يخبط
----
الليل بالنهار
الزعيم